വാക്കുകള്‍

അക്ഷരങ്ങള്‍ പരസ്പരം കൈകോര്‍ത്ത്

വാക്കിനൊപ്പം വരിയിട്ടൊഴുകവേ

വന്നു നിന്നു കൂട്ടക്ഷരത്തല്ലുകാര്‍

മുന്നിലും പിന്നിലും വഴി വക്കിലും

ഏറെ നാള്‍ വെയില്‍ കൊണ്ടും തണുപ്പേറ്റു-

കൂരയില്ലാതുറക്കം മുടക്കിയും

കട്ടെടുക്കപ്പെടാതിരിക്കാനക -

പ്പട്ടിനുള്ളില്‍ പ്പൊതിഞ്ഞു സൂക്ഷിച്ചവ

വേദനയുണ്ടതില്‍ കുറേയോര്‍മ്മതന്‍ 

വേവലാതിയുണ്ടേറെയുല്‍സാഹവും

വേപഥു കോറി നില്‍ക്കുന്ന ജീവിത -

ച്ചിത്രവും ചിതാഭസ്മ കുംഭങ്ങളും

പോറലേല്‍പ്പിച്ചു പോകാനൊരുങ്ങേണ്ട

പോരിനില്ലാരു മീവഴിത്താരയില്‍

വാക്കുകള്‍ കൂട്ടി മുട്ടിയാലിപ്പോഴും

തീക്കനല്‍പ്പൊരി പാറുമേന്നോര്‍ക്കുക 

നിങ്ങളെല്ലാം സുഹൃത്തുക്കള്‍ , കാലത്തി -

നേറെ മുന്‍പേ നടപ്പവര്‍ , പുല്‍ച്ചെടി -

ത്തണ്ടുപോലും പിഴുതെറിഞ്ഞോര്‍മ്മയെ - 

ക്കൊന്നു വീണ്ടും കൊല വിളിക്കുന്നവര്‍

പ്രിയ സുഹൃത്തിന്റെ മാറില്‍ കഠാരതന്‍ 

മുനയിറക്കിക്കിതച്ചുനില്‍ക്കുമ്പോഴും 

കരളിനടിയിലെ കുതറുന്ന വാക്കുകള്‍

കവിതയാണെങ്കില്‍ , കരുതി വിട്ടേക്കുക...!